Këshilli i Sigurimit i OKB-së diskuton sot raportin e UNMIK-ut: bllokadë institucionale dhe tensione në rritje në veri të Kosovës

Këshilli i Sigurimit i Kombeve të Bashkuara do të diskutojë sot raportin gjashtëmujor për punën e Misionit të OKB-së në Kosovë (UNMIK), siç njofton RTS-ja, duke iu referuar agjencisë Tanjug. Raportin pritet ta paraqesë përfaqësuesi special i sekretarit të përgjithshëm të OKB-së dhe shefi i UNMIK-ut, Peter Due, i cili e mori detyrën në janar të këtij viti.

Raporti, i cili mbulon periudhën nga 16 marsi deri më 15 shtator, vlerëson se situata e përgjithshme e sigurisë në Kosovë ka mbetur e qëndrueshme, por se bllokada institucionale ka vazhduar. Sipas raportimit të RTS-së, në dokument thuhet se “përparimi në zbatimin e Marrëveshjes së Brukselit ka mbetur i kufizuar”, ndërsa tensionet mes autoriteteve të Prishtinës dhe vetëqeverisjeve lokale janë rritur, veçanërisht në veri të Kosovës.

Në raport përmenden edhe arrestime të serbëve, mbyllja dhe pengimi i punës së institucioneve që funksionojnë në sistemin e Serbisë, kufizime që lidhen me simbolet fetare dhe kulturore, keqtrajtime nga policia, si dhe rrënime pronash dhe dëbime. Sipas dokumentit, siç njofton RTS-ja, këto zhvillime kanë kontribuar në ndjenjën e pasigurisë dhe të trajtimit të pabarabartë mes serbëve të Kosovës.

Seancën e sotme do ta kryesojë ambasadori i Greqisë pranë OKB-së, vendi i cili ka marrë kryesimin e radhës njëmujor të Këshillit të Sigurimit. Raporti i mëparshëm u shqyrtua nga Këshilli më 9 prill, ndërsa Serbinë në atë seancë e përfaqësoi ministri i Jashtëm, Marko Gjuriq.