Trump përdor termin antisemit “Shylock” në Kansas teksa mbron senatorin Marshall për paditë ndaj pacientëve

Presidenti Donald Trump përdori një term antisemit të hënën, teksa mbronte senatorin e Kansasit, Roger Marshall, nga kritikat për praktikat e tij të faturimit mjekësor, siç njofton CNN. Trump e përdori termin “Shylock” duke mbrojtur Marshall-in për paditjen e më shumë se 700 pacientëve për fatura mjekësore të papaguara gjatë kohës kur ai punonte si obstetër-gjinekolog, një praktikë e raportuar fillimisht nga The New York Times.

“Nuk të lejohet të mos e bësh. Duhet, me ligj, t’i ndjekësh ata njerëz, dhe ata e paraqitën sikur ai ishte një lloj tipi ‘Shylock'”, tha Trump në tubimin në Kansas. “Nëse ai nuk do t’i kishte bërë këto kërkesa, do të kishte shkelur ligjin. Do të kishte shkelur një ligj penal shumë të fortë dhe do t’i nënshtrohej arrestimit penal dhe përgjegjësisë”, shtoi presidenti.

Nuk është hera e parë që Trump e përdor këtë term në publik. Siç kujton CNN, ai e kishte thënë edhe në korrik të vitit 2025, gjatë një tubimi në Ajova, dhe më pas kishte deklaruar se nuk e dinte që fjala shihej nga disa si antisemite. “Nuk e kam dëgjuar kurrë në atë mënyrë. Për mua, Shylock është dikush që jep para me kamata të larta”, u kishte thënë Trump gazetarëve në atë kohë. “Nuk e kam dëgjuar kurrë në atë mënyrë, ju e shihni ndryshe nga unë.”

Liga Kundër Shpifjes (ADL) e kishte dënuar vitin e kaluar përdorimin e fjalës nga Trump, duke e quajtur “shumë shqetësues dhe të papërgjegjshëm”. “Kjo nënvizon se sa thellë të rrënjosura mbeten gënjeshtrat dhe teoritë e konspiracionit për hebrenjtë në vendin tonë. Fjalët e udhëheqësve tanë kanë rëndësi dhe presim më shumë nga Presidenti i Shteteve të Bashkuara”, shkroi ADL në atë kohë.

Termi i ka kushtuar kërkim-falje edhe politikanëve të tjerë: në vitin 2014, ish-presidenti Joe Biden kërkoi falje për përdorimin e së njëjtës fjalë. Në Kansas, Trump ndodhej për të mbështetur rizgjedhjen e Marshall-it në garën e Senatit, në javët e fundit para zgjedhjeve të mesmandatit të 3 nëntorit.