Kikia rreshton arritjen e protestës: Ja çfarë ka arritur, ne nuk e parashikojmë dot

Gazetari Mentor Kikia ka folur rreth protestës qytetare në Tiranë këtë të premte për Review me Greta Topjana në Euronews Albania. Kikia ka thënë se protesta ka arritur disa objektiva, nga shfuqizimi i ligjit te ngacmimi i nervit të shoqërisë.

“Mendoj që protesta ka marrë trajtën e një lëvizjeje shoqërore dhe është më e madhe se një protestë, është më e madhe se një akt reagimi qytetar. Është e vështirë sepse nuk e dimë në çfarë faze është lëvizja. Po ajo ka shkuar përtej çdo parashikimi. Vetëm nëse ka ndonjë regjisor prapa, po unë besoj se ne nuk e kemi parashikuar. Nëse do përpiqeshe shumë të ftohtë, mund të rendis, e para protesta në aspektin mjedisor ka marrë dy arritje, presionin me amendamentin në Parlamentin Europian për shfuqizimin e ligjit për Zonat e Mbrojtura, e dyta një moratorium për të gjitha ndërtimet në zonat e mbrojtura. Në aspektin shoqëror, ka shkundur shoqërinë nga kafenetë dhe e ka nxjerrë në rrugë. Tani në tryezë është dimensioni politik. Tani është politika.” – tha Kikia.