Kinë: Vihet në funksionim radioteleskopi më i madh në botë
Radioteleskopi më i madh në botë u vu në funksionim të dielën, i montuar në një rajon malor të provincës jugperëndimore kineze Guizhou. Teleskopi i ri i quhet FAST dhe do të mbledhë sinjale nga universi, ndërkohë që shkencëtarët shpresojnë se përmes tij do të jenë në gjendje të komunikojnë me jetën jashtëtokësore.
Teleskopi me hapje sferike ka përmasat e 30 fushave futbolli. Shkencëtarët kinezë thanë se falë superantenave shumë të ndjeshme FAST do të diktojë edhe sinjalet më të dobëta nga universi. Peter Wilkinson, profesori i Radio Astronomisë pranë Universitetit të Manchester-it, tha se ekszitojnë dy veçanti pse FAST-i do ta bëjë më mirë punën se çdo teleskop tjetër që është ndërtuar deri më sot në botë.
“E para është studimi i rrezatimit për elementet më të thjeshta në univers dhe do na tregojë të gjitha llojet e gjërave, përfshi lëvizjen e materieve në univers. Veçantia e dytë kryesore ka të bëjë me zhurmat e objekteve qiellore dhe valët elektromagnetike. Këto veçanti do të mundësojnë zbulime të mëtejshme të valëve gravitacionale, një pjesë e teorisë së Ajnshtajnit mbi Teorinë e Relativitetit.” Sipas shkencëtarëve, këto valë mundësojnë shikimin në pjesën më të largët të universit.
Ndërtimi i FAST-it nisi në vitin 2011 dhe ky projekt kushtoi rreth 180 milionë dollarë amerikanë. Presidenti i Kinës Xi Jinping përgëzoi me një mesazh urimi shkencëtarët, inxhinierët dhe ndërtuesit që punuan për ndërtimin dhe vënien në funksionin të teleskopit gjigant.
FAST-i ka një diametër 500 metra dhe një sipërfaqe sa 300 fusha futbolli. Nëpërmjet tij mund të kapen radiosinjale që dërgohen nga planetet e largët. Shkencëtarëve dhe inxhinierëve kinezë u janë dashur 22 vjet për studimin dhe krijimin e këtij radioteleskopi. Ndërtimi i tij filloi nga viti 2011, ndërsa montimi korrikun e kaluar.
