Kitaristi Goran Krivokapic hap edicionin e dhjetë të “Albania Guitar Festival”

“Albania International Guitar Festival” një nga ngjarjet e rëndësishme muzikore mbërrin këtë vit në edicionin e dhjetë. Festivali sjell në Shqipëri artistë me famë ndërkombëtare. Kitaristi i famshëm nga Gjermania, Goran Krivokapic do të hapë edicionin e 10-të të “Albania International Guitar Festival” me një performancë të jashtëzakonshme. Goran Krivokapic është fitues i disa prej konkurseve më prestigjioze ndërkombëtare, përfshirë “Michele Pittaluga” në Alessandria, Itali, “Andrés Segovia” në La Herradura, Spanjë, Koblenz International Guitar Competition, si dhe Guitar Foundation of America- GFA.

Koncerti i tij do të zhvillohet mbrëmjen e datës 22 maj salla “Tonin Harapi” në Tiranë. Si interpretues, ai është i ftuar rregullisht në festivale të rëndësishme ndërkombëtare si Festspiele Mecklenburg-Vorpommern, Festival Internacional de Música y Danza de Granada, Kotor Art, Koblenz International Guitar Festival, Forum Gitarre Wien, Iserlohn International Guitar Festival, GFA International Guitar Convention, Guitar Art Festival, Shenyang Guitar Festival dhe shumë të tjera.

Pas një karriere të pasur pedagogjike në institucione të rëndësishme evropiane, ai aktualisht jep mësim në Detmold University of Music dhe është profesor i kitarës në The Cologne University of Music and Dance në Gjermani. Ky koncert hap zyrtarisht edicionin jubilar të 10-të të festivalit dhe realizohet në partneritet me Ambasadën e Gjermanisë në Shqipëri, me mbështetjen e Ministrisë së Turizmit, Kulturës dhe Sportit, Bashkisë Tiranë dhe donatorë të tjerë.