Klientëve në nevojë nuk do t’u ndërpritet furnizimi me energji elektrike

Klientëve në nevojë nuk do t’ju ndërpritet furnizimi me energji elektrike, ndërsa  Operatori i Sistemit të Shpërndarjes së Energjisë Elektrike (OSHEE), do t’i ofrojë atyre një plan pagese për faturat e papaguara, që i përshtatet të ardhurave që marrin.

Enti Rregullator i Energjisë, me anë të një rregullore i parashtron OSHEE-së që të mos u ndërpresë furnizimin  me energji elektrike abonentëve me statusin e ‘klientit  në nevojë’, edhe kur këta të fundit nuk kanë arritur të paguajnë në kohë faturat.

Sipas ligjit me numër 43 të vitit 2015 statusin e ‘klientit në nevojë’ e fitojnë klientët  familjar, të cilët , për shkak të gjendjes sociale, gëzojnë disa të drejta të veçanta lidhur me furnizimin me energji elektrike. Sipas rregullores, klientit në nevojë do t’i ofrohet një plan pagese, që i përshtatet të ardhurave të tij. E vetmja mundësi që klientit në nevojë i ndërpritet energjisë është nëse ofruesi i shërbimit, në këtë rast OSHEE, i ka ofruar dy herë një plan pagese që përshtatet me të ardhurat e klientit ose asistencë pagese, në kuadër të statusit si “klient në nevojë” dhe nuk është zbatuar.