Koalicioni proevropian ‘Evropska Srbija’ dorëzon listën zgjedhore te RIK-u për zgjedhjet e 25 tetorit

Koalicioni proevropian “Evropska Srbija” dorëzoi më 19 shtator listën e tij zgjedhore pranë Komisionit Republikan Zgjedhor (RIK), duke paraqitur kutitë me 10 mijë firmat e mbledhura që kërkohen për pjesëmarrjen në zgjedhjet e parakohshme parlamentare të 25 tetorit. RIK-u duhet tani të verifikojë firmat, para se të shpallë zyrtarisht listën e re të koalicionit të përbërë nga Stranka slobode i pravde (SSP) e Dragan Ðilasit, lëvizja SRCE e Zdravko Ponošit, Solidarnost e Goran Ješićit dhe deputetja Marinika Tepić.

Dorëzimi i listës vjen pas disa ditësh mosmarrëveshjesh të brendshme që e tronditën koalicionin. Sipas televizionit N1, disa zyrtarë të lartë të SSP-së, përfshirë Borko Stefanovićin, Goran Petrovićin, Mila Popovićin, Vladimir Vrsajkovin dhe Jelena Miloševićin, i tërhoqën emrat e tyre nga lista. Njëkohësisht, dy anëtarë të kryesisë së SRCE-së, Slobodan Petrović dhe Boško Šindić, njoftuan se nuk e mbështesin më vendimin për të garuar në zgjedhje dhe po largohen nga partia.

Duke iu përgjigjur kritikave, lideri i SRCE-së Zdravko Ponoš deklaroi se ideja e “atmosferës së referendumit” vdiq pasi studentët deklaruan se nuk duan bashkëpunim me opozitën. Sipas tij, partitë ekzistojnë për të marrë pjesë në zgjedhje, ndaj vendimi për të garuar më 25 tetor ishte i pashmangshëm.

Kujtojmë se më herët një koalicion tjetër opozitar, “Narodna Srbija”, arriti të mbledhë firmat, por vendosi të tërhiqet dhe të mbështesë listën studentore “Studenti pobeđuju”. Në zgjedhjet e 25 tetorit pritet të garojnë të paktën tetë lista zgjedhore.

Një ditë më parë, presidenti Aleksandar Vuçiç shkoi për peshkim pranë Smederevës, në liqenin e Šalincit, ku pranoi se nuk kishte ditur kurrë të peshkonte. Vuçiç paralajmëroi se do të japë dorëheqjen pasi të kthehet nga Asambleja e Përgjithshme e OKB-së në Nju Jork dhe do të hyjë në fushatë “si qytetar i zakonshëm”.

Burimi: BBC News në serbisht