Koalicioni saudit rrëzon tre raketa balistike të Huthi-ve drejt Riadit
Koalicioni i udhëhequr nga Arabia Saudite njoftoi se kapi dhe shkatërroi tre raketa balistike të lëshuara nga Huthi-t drejt kryeqytetit Riad, ndërsa Mbrojtja Civile saudite lëshoi dhe më pas hoqi alarmet e emergjencës për qytetin — nata e tretë radhazi me alarme në kryeqytet.
Koalicioni ushtarak i udhëhequr nga Arabia Saudite njoftoi se ka kapur dhe shkatërruar tre raketa balistike të lëshuara nga rebelët Huthi të Jemenit drejt kryeqytetit saudit, Riadit, siç njofton Al Jazeera. Sulmi shënon natën e tretë radhazi që kryeqyteti saudit vihet nën alarm për shkak të raketave të Huthi-ve.
Përpara njoftimit të koalicionit, Agjencia e Mbrojtjes Civile saudite kishte lëshuar dy alarme emergjence për Riadin, të cilat i hoqi pak më vonë duke njoftuar se rreziku kishte kaluar. Alarme të ngjashme u lëshuan dhe u hoqën gjatë mbrëmjes edhe për provincën e Najranit dhe për zonën al-Sulayyil, në jug të vendit.
Autoriteti i Përgjithshëm i Aviacionit Civil saudit mohoi ndërkohë raportimet se operacionet në Aeroportin Ndërkombëtar “Mbreti Khalid” të Riadit ishin pezulluar, duke sqaruar se fluturimet kanë vijuar normalisht.
Sulmet e Huthi-ve ndaj kryeqytetit saudit janë intensifikuar ditët e fundit, në kuadër të përshkallëzimit rajonal të lidhur me luftën SHBA–Iran. Një natë më parë, një sulm i Huthi-ve dëmtoi kullën e Fondit sovran saudit në Riad, ndërsa koalicioni ka goditur pozicione të grupit në Jemen, përfshirë portin e Hodeidahut.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.