Komedia “Martini”, që trajton lirinë personale, marrëdhëniet familjare dhe vetminë, premierë në teatrin “Bylis”

Komedia “Martini” shënoi premierën këtë sezon në skenën e teatrit “Bylis” në qytetin e Fierit. Vepër e autorit të njohur Odise Plaku erdhi në skenë me regji nga Adelina Muça. Komedia “Martini” është historia e dy grave, Laura dhe Media, të cilat me humor, kujtime dhe ëndrra të parealizuara zbulojnë anët më të fshehta të vetes. Një takim i zakonshëm mes dy mikeshash të vjetra shndërrohet në një udhëtim plot të qeshura, rrëfime të sinqerta dhe situata të papritura, ku publiku do të gjejë pjesë nga vetja, familja dhe përditshmëria e tij.

Me interpretim nga Adelina Muça dhe aktorja Julia Ilirjani u soll për publikun dhe një nga komeditë e veçanta të sezonit teatror. Përmes një gjuhe të gjallë skenike dhe dialogëve të mprehtë, autori Odise Plaku trajton tema universale si liria personale, identiteti, marrëdhëniet familjare, vetmia dhe dëshira për të jetuar jetën sipas zgjedhjeve të veta.

Komedia ndërton situata, ku e qeshura vjen natyrshëm, por pas saj fshihet një reflektim i thellë mbi jetën dhe sfidat e njeriut bashkëkohor. Regjisorja Adelina Muça solli në skenë me këtë shfaqje një koncept dinamik dhe plot ritëm, duke vendosur në qendër fuqinë e interpretimit aktorial. “Martini” është një komedi, që nuk kufizohet vetëm te argëtimi. Ajo fton publikun të reflektojë mbi lirinë individuale, mbi ëndrrat e lëna pezull dhe mbi nevojën që secili të gjejë hapësirën e vet për të jetuar i lirë. Shfaqja u vu në skenë në datat 11, 12 dhe 13 qershor.