Komisioni Evropian prezanton paketë për thjeshtimin e taksave, kursime deri në 8 miliardë euro në vit

Komisioni Evropian prezantoi të mërkurën një paketë të re për thjeshtimin e sistemit tatimor, e cila synon t’u kursejë bizneseve në Bashkimin Evropian rreth 8 miliardë euro në vit, përfshirë 3.3 miliardë euro në kosto administrative.

Dy ligjet e propozuara kanë për qëllim reduktimin e burokracisë, në kuadër të përpjekjeve për ta bërë Evropën më tërheqëse për investime dhe zhvillim biznesi.

“Duke hequr kërkesat procedurale paraprake dhe duke thjeshtuar proceset e rimbursimit, masa do të lehtësojë financimin, do të inkurajojë investimet dhe do të rrisë konkurrueshmërinë”, thuhet në deklaratën e Komisionit.

Një nga masat kryesore të paketës është përjashtimi nga tatimi në burim për pagesat ndërkufitare të dividentëve, interesave dhe honorareve mes kompanive të BE-së. Sipas Komisionit, kjo masë e vetme pritet të sjellë kursime prej rreth 5.3 miliardë eurosh në vit për taksapaguesit evropianë.

Përveç kësaj, paketa parashikon edhe një standard të përbashkët për trajtimin tatimor të investimeve në kërkim dhe zhvillim, me qëllim rritjen e atraktivitetit të Evropës për investitorë. Komisioni vlerëson se këto ndryshime mund të rrisin PBB-në e BE-së me rreth 0.2 për qind në vit.