Kongresi i 76-të i FIFA-s thekson rolin e Kupës së Botës në bashkimin e njerëzve në mbarë botën dhe riafirmon angazhimin kundër racizmit

Federata Shqiptare e Futbollit mori pjesë në punimet e Kongresit të 76-të të FIFA-s, i zhvilluar më 30 prill 2026 në Vancouver, Kanada, ku u diskutuan dhe u miratuan një sërë vendimesh me ndikim të madh për futbollin botëror. FSHF u përfaqësua në këtë event të rëndësishëm nga Presidenti Armand Duka. Në fokus të Kongresit […]

Federata Shqiptare e Futbollit mori pjesë në punimet e Kongresit të 76-të të FIFA-s, i zhvilluar më 30 prill 2026 në Vancouver, Kanada, ku u diskutuan dhe u miratuan një sërë vendimesh me ndikim të madh për futbollin botëror. FSHF u përfaqësua në këtë event të rëndësishëm nga Presidenti Armand Duka.

Në fokus të Kongresit ishte Kupa e Botës 2026, që sipas drejtuesve të FIFA-s do të shërbejë si një platformë globale për bashkimin e njerëzve dhe promovimin e respektit dhe harmonisë mes kombeve. Presidenti i FIFA-s, Gianni Infantino, theksoi rolin unik të futbollit për të ndërtuar ura komunikimi në një botë të ndarë, duke nënvizuar se Kupa e Botës do të përcjellë një mesazh të fortë uniteti.

Një tjetër temë kyçe ishte përditësimi mbi iniciativën globale kundër racizmit, e miratuar në vitin 2024. FIFA raportoi progres konkret në këtë drejtim, duke përfshirë ndryshime në Kodin Disiplinor, zbatimin e gjestit “No Racism” në të gjitha turnetë, si dhe mbrojtjen e mijëra lojtarëve dhe ekipeve në rrjetet sociale përmes shërbimeve të dedikuara.

Në aspektin financiar, Kongresi miratoi raportin vjetor për vitin 2025 dhe buxhetin për ciklin 2027-2030, i cili parashikon të ardhura rekord prej 14 miliardë dollarësh. Një pjesë e konsiderueshme e këtyre fondeve do të investohet në zhvillimin e futbollit përmes programit FIFA Forward, me një rritje të ndjeshme të mbështetjes për të 211 federatat anëtare.

Gjatë punimeve u trajtuan edhe çështje të tjera me rëndësi, ku u theksua roli i futbollit si mjet për ndërtimin e urave dhe promovimin e paqes.

Në përfundim, FIFA konfirmoi se Kongresi i 77-të do të zhvillohet më 18 mars 2027 në Rabat, Marok, ndërsa më 23 nëntor 2026 do të organizohet një Kongres i Jashtëzakonshëm virtual për përzgjedhjen e vendeve pritëse të Kupës së Botës për vajza 2031 dhe 2035.