Kontrolle për ndotjen akustike në Shkodër dhe Velipojë, policia monitoron lokalet me muzikë

Edhe Policia e Shkodrës, ashtu si kolegët e saj në bregdetin e Durrësit dhe Vlorës krahas zbatimit të planit të masave për garantimin e sigurisë publike gjatë sezonit turistik veror ka kryer kontrolle për nivelin e zhurmave dhe zbatimin e orarit të aktiviteteve me muzikë në qytet si dhe në Velipojë.

Sipas hartëzimit të zonave me risk për ndotje akustike, efektivët kanë organizuar grupe kontrolli në terren. Në bazë të ligjit nr. 9774, datë 12.07.2007, “Për administrimin e zhurmës në mjedis”, të ndryshuar, ata kanë testuar me matës të zhurmës disa ambiente dhe subjekte, të hapura dhe të mbyllura, në Shkodër dhe Velipojë.

Matjet e realizuara, sipas kushteve të përcaktuara në procedurën standarde për këtë qëllim, kanë rezultuar brenda kufijve të lejuar.

Krahas matjes së nivelit të zhurmës, strukturat përgjegjëse kanë kryer kontrolle edhe për respektimin e orarit të lejuar për aktivitetet me muzikë në ambiente të hapura dhe në qendra të banuara, i cili është nga ora 11:00 deri në orën 24:00 ndërsa janë organizuar takime sensibilizuese me pronarë dhe administratorë subjektesh, aktivitetet e të cilëve gjenerojnë zhurmë nga muzika.

Policia apelon qytetarët të denoncojnë çdo shkelje dhe çdo paligjshmëri që hasin, duke u garantuar anonimat dhe ndërhyrje të menjëhershme në përputhje me ligjin.