Kordić: Linja direkte Podgoricë–Bruksel, mundësi shtesë për forcimin e lidhjeve turistike me Belgjikën

Linja e re direkte ajrore Podgoricë–Bruksel, e cila nis më 30 nëntor me tri fluturime në javë, është një mundësi shtesë për forcimin e lidhjeve turistike mes Malit të Zi dhe Belgjikës, siç njofton RTCG. Kështu u shpreh ministrja e Turizmit, Simonida Kordić, gjatë takimit me drejtoreshën ekzekutive të “Visit Flanders”, Lin Gejsen, ku u diskutua për mënyrat se si lidhja e re ajrore mund t’i afrojnë edhe më shumë të dy vendet.

Në takim u bisedua për përmirësimin e bashkëpunimit, për shkëmbimin e përvojave në zhvillimin e destinacioneve, për digjitalizimin, si dhe për politikat e turizmit të bazuara në të dhëna të besueshme. Të dyja palët u ndalën te nevoja që vendimet në turizëm të mbështeten në informacione të sakta dhe të përditësuara, në mënyrë që oferta turistike të zhvillohet në mënyrë të qëndrueshme.

Kordić prezantoi rezultatet aktuale të turizmit malazez, përfshirë rritjen e numrit të turistëve dhe të netëve të qëndrimit, duke theksuar rëndësinë e lidhshmërisë më të mirë ajrore për sektorin. Ajo vuri në dukje edhe potencialin e zonave rurale dhe malore, njohjet ndërkombëtare që ka marrë Mali i Zi, si dhe masat nxitëse për ofruesit e shërbimeve turistike. Sipas saj, klima e favorshme dhe numri i madh i ditëve me diell bëjnë të mundur një ofertë turistike gjatë pjesës më të madhe të vitit.

Palët shqyrtuan gjithashtu bashkëpunimin përmes UN Tourism dhe Komisionit të tij për Evropën, Komisionit Evropian të Udhëtimit (ETC) dhe rrjetit NECSTouR. Në këtë kuadër, Kordić ka propozuar krijimin e një trupi konsultativ në nivelin e UN Tourism, të përbërë nga kryetarët e komisioneve rajonale, si një hap për të forcuar bashkërendimin dhe shkëmbimin e përvojave.

Gejsen shprehu gatishmërinë për të ndarë metodologjinë e “Visit Flanders” për ndjekjen e vizitave turistike dhe të kënaqshmërisë së banorëve vendas me turizmin, e cila mund të ndihmojë në zhvillimin e Sistemit Informativ të Turizmit (TIS) të Malit të Zi.