Drejtori i Mossad-it në Uashington për luftën ndaj Iranit: Netanyahu i kërkon Trump-it rifillimin e luftimeve, Trump e refuzon

Drejtori i Mossad-it, shërbimit të inteligjencës së jashtme të Izraelit, ndodhet në Uashington për bisedime me zyrtarë të lartë të administratës së presidentit Donald Trump mbi luftën ndaj Iranit, siç njofton Al Jazeera, duke iu referuar medias amerikane Axios.

Sipas raportimit, Roman Gofman po takohet me drejtorin e CIA-s, John Ratcliffe, dhe pritet të udhëtojë edhe në Miami për një takim me të dërguarin e Shtëpisë së Bardhë, Steve Witkoff. Vizita e shefit të spiunazhit izraelit vjen në një moment kur kryeministri Benjamin Netanyahu po i bën presion presidentit Trump të rifillojë luftën kundër Iranit.

Gjithmonë sipas Axios, Trump deri tani e ka refuzuar këtë presion dhe çështjen e luftës ndaj Iranit e ka diskutuar me Netanyahun edhe në një telefonatë më 5 nëntor. Në vend të rikthimit në luftime, presidenti amerikan ka marrë anën e Arabisë Saudite, Katarit dhe Emirateve të Bashkuara Arabe: vazhdimin e bllokadës detare dhe të fushatës së presionit ekonomik ndaj Iranit, duke parë nëse një marrëveshje është e mundur.

Edhe Gadi Eisenkot, i cili po formon qeverinë pas zgjedhjeve të javës së kaluar në Izrael, nuk mendon se situata aktuale kërkon veprim të menjëhershëm ushtarak kundër Iranit, tha Axios, duke cituar një burim pranë tij. Bisedimet në Uashington tregojnë pra se, të paktën për momentin, rruga e bllokadës dhe presionit po mbizotëron mbi kërkesën për rifillimin e luftës.