KORDIQ: SEZON REKORD, RRITEN TË ARDHURAT NGA TURIZMI

_{Foto: Qeveria e Malit të Zi / Vlada Crne Gore}

Të ardhurat nga sektori i udhëtimeve dhe turizmit në Mal të Zi arritën në 465,05 milionë euro gjatë gjashtë muajve të parë të këtij viti, duke shënuar një rritje prej 8,75 për qind krahasuar me të njëjtën periudhë të vitit të kaluar.

Ministrja e Turizmit, Simonida Kordiq, duke iu referuar të dhënave të Bankës Qendrore të Malit të Zi, tha se shifrat financiare konfirmojnë rezultatet pozitive të sezonit turistik të këtij viti.

Sipas saj, të ardhurat nga turizmi gjatë dy tremujorëve të parë të vitit janë 82,34 për qind më të larta edhe në krahasim me të njëjtën periudhë të vitit 2019, para pandemisë.

Kordiq vlerësoi se këto rezultate tregojnë forcimin e pozitës së Malit të Zi në tregun turistik ndërkombëtar dhe se cilësia e ofertës turistike po vlerësohet gjithnjë e më shumë.

Ajo tha se rezultatet janë dëshmi konkrete e punës së të gjithë sektorit dhe shprehu kënaqësi për sezonin rekord, i cili ende nuk ka përfunduar.