Tivari anulon programin muzikor për Ditën e Komunës: fondet shkojnë për fëmijët që mbetën pa prindër

Komuna e Tivarit njoftoi se programi tradicional muzikor për qytetarët, i planifikuar për Ditën e Komunës më 24 nëntor, nuk do të organizohet këtë vit, siç njofton Vijesti. Vendimin e mori Bordi Organizativ gjatë përgatitjeve për shënimin e festës, ndërsa fondet që do të shpenzoheshin për programin muzikor do t’u drejtohen atyre që kanë më shumë nevojë për ndihmë dhe mbështetje.

Përfitues të ndihmës janë fëmijët që në ngjarjen tragjike të fundit, e cila tronditi thellë Tivarin, mbetën pa të dy prindërit, pa kujdesin dhe mbështetjen prindërore. Komuna, e kryesuar nga kryetari Dušan Raičević, thekson se në bashkëpunim me institucionet kompetente do të sigurojë që fondet e ndara të përdoren në interesin më të mirë të fëmijëve, si mbështetje për rritjen, arsimin dhe të ardhmen e tyre.

Sipas Komunës, Dita e Komunës është festa e të gjithë qytetarëve dhe një rast për të treguar vlerat e komunitetit, ndaj paratë e programit muzikor duhet të shkojnë tek ata që kanë më shumë nevojë për ndihmë. ‘Le të jetë Dita e Komunës e këtij viti një tjetër konfirmim i vlerave të solidaritetit dhe bashkimit’, thuhet në njoftimin e Komunës. Edhe CdM njofton për të njëjtin vendim të Komunës së Tivarit për ridrejtimin e fondeve në ndihmë të fëmijëve.