Kosova zhvillon stërvitjen e radhës, Ermal Krasniqi mungon për shqetësime muskulore

Kombëtarja e Kosovës ka zhvilluar edhe një seancë tjetër stërvitore para përballjes me Izraelin, siç njofton Telegrafi. Stërvitja e radhës e Dardanëve është zhvilluar me intensitet të lartë në stadiumin “Fadil Vokrri”, në kuadër të përgatitjeve për sfidën e së shtunës.

Përzgjedhësi Franco Foda ka vazhduar punën me futbollistët, duke u fokusuar në aspektet taktike, organizimin e lojës dhe detajet që synojnë ta përgatisin sa më mirë ekipin për ndeshjen e ardhshme, raporton Federata e Futbollit e Kosovës.

Megjithatë, në stërvitjen e sotme ka munguar anësori i Amedsporit, Ermal Krasniqi, i cili ka ndjerë shqetësime muskulore. Krasniqi ndodhet nën përkujdesjen e stafit mjekësor të Kombëtares dhe, pas ekzaminimeve mjekësore, do të bëhet i ditur vlerësimi për gjendjen e tij.

Sfida mes Kosovës dhe Izraelit zhvillohet të shtunën nga ora 15:00 në Prishtinë, në kuadër të Ligës së Kombeve, dhe Dardanët synojnë ta shfrytëzojnë maksimalisht avantazhin e fushës vendase.