Parlamenti Europian i heq sërish imunitetin Latinopoulou, këtë herë për padinë e Papadimoulis

Parlamenti Europian votoi të enjten heqjen e imunitetit parlamentar të eurodeputetes greke Afroditi Latinopoulou, pas një kërkese të prokurorisë së Athinës, siç njofton Kathimerini. Me këtë vendim, vlerësimi ligjor i çështjes kalon tani në duart e drejtësisë greke.

Sipas raportimit të Kathimerini, çështja lidhet me një padi të Dimitris Papadimoulis, i cili e përfaqësoi partinë e majtë SYRIZA në Parlamentin Europian nga viti 2014 deri në vitin 2024. Padia ka të bëjë me një postim të Latinopoulou në rrjetin X në qershor të vitit 2020, ku ajo e akuzonte Papadimoulis, bashkë me figura të tjera politike, se kishin kontribuar në neverinë e qytetarëve ndaj politikës.

Në atë postim, Latinopoulou pretendonte gjithashtu se Papadimoulis ishte pasuruar me mjete të paligjshme, pasi kishte hyrë në politikë pa asgjë. Sipas avokatëve të Papadimoulis, këto pretendime përbëjnë fyerje të personalitetit të klientit të tyre.

Latinopoulou drejton partinë e djathtë Zëri i Arsyes. Kjo është hera e dytë që Parlamenti Europian i heq asaj imunitetin: në shtator, një vendim i ngjashëm u mor për një çështje tjetër, që lidhej me firmat e nevojshme për themelimin e partisë së saj, ndërsa rasti i sotëm është një procedurë e veçantë gjyqësore.