Orikum, banorët protestojnë kundër vjedhjes së pronave
Banorë të Orikumit dhe Rradhimës, së bashku me një grup deputetësh të Partisë Demokratike dhe përfaqësues të kësaj partie protestuan këtë të hënë duke bllokuar rrugën nacionale në aksin Vlorë-Orikum.
Qëllimi i protestës së tyre ishte, siç thanë banorët, kundër vjedhjes së pronave, por edhe kundër projekteve për ndërtimin e një impianti të madh për rritjen e peshkut në gjirin e Vlorës.
Përfaqësuesi i PD, Jamarbër Malltezi ka kundërshtuar projektin në fjalë, që parashikon ndërtimin e disa vaskave të rritjes së peshkut në gjirin e Karaburunit, pasi kështu do të rrezikohet parku detar Karaburun-Sazan dhe do të dëmtohet turizmi i Vlorës.
Banorët kanë protestuar edhe për projektet e ndërtimit në tokat e tyre, për të cilat thonë se nuk janë pyetur. Në këtë zonë vazhdimisht ka patur protesta.
Në nëntor të vitit 2010, banorët e Dukatit u përleshën me policinë kur Ministria e Energjitikës së asaj kohe kishte në plan ndërtimin e një parku për prodhimin e energjisë elektrike nga era në Karaburou.
Por, edhe në vitin 2012, kur për ndërtimin e një parku me pallate, shumë banorëve të Orikumit nuk iu njoh pronësia e tokës.
