Krapoviq: Nuk kam bërë presion mbi prokurorinë, nuk do të më heshtin dhe nuk do ta ndalin reformën e Ushtrisë

Ministri i Mbrojtjes i Malit të Zi, Dragan Krapoviq, hodhi poshtë akuzat se për shkak të funksionit që mban ka pozitë të privilegjuar përpara institucioneve, duke theksuar se kurrë nuk ka bërë presion mbi prokurorët dhe nuk ka kërkuar asnjë favor, siç njofton Portal Analitika. Ai reagoi për kallëzimet penale që ai dhe avokati Veselin Radulloviq kanë bërë kundër njëri-tjetrit, duke thënë se pret që institucionet kompetente të vërtetojnë të gjitha faktet.

“Nuk kam telefonuar prokurorë, nuk kam kërkuar shërbime, nuk kam ndërhyrë dhe nuk i kam thënë askujt se si e kur duhet të vendosë. Përkundrazi, Prokurorisë Speciale të Shtetit dhe të gjitha organeve kompetente u qëndroj në dispozicion 24 orë në ditë, shtatë ditë në javë. Nuk kam çfarë të fsheh dhe nuk kam nga çfarë të iki”, tha Krapoviq, sipas raportimit të Portal Analitika.

Ministri shtoi se Radulloviqi ka bërë disa kallëzime penale kundër tij, ndërsa edhe vetë ai ka bërë kallëzime kundër avokatit. “Nëse unë kam shkelur ligjin, le të përgjigjem! Nëse Radulloviqi ka bërë me vetëdije kallëzime të rreme, le të përgjigjet ai! Nuk ka të privilegjuar, nuk ka të paprekshëm”, theksoi ai.

Krapoviq vlerësoi se kundër tij dhe Ministrisë së Mbrojtjes po zhvillohet një fushatë diskreditimi politik, e cila, sipas bindjes së tij, lidhet me projektin e blerjes së anijeve patrulluese për Ushtrinë e Malit të Zi, projekt që ai e quajti më të madhin në historinë e Ushtrisë. Ai tha se Partia Demokratike e Socialistëve (DPS) nuk mund ta pranojë realizimin e këtij projekti dhe e ftoi Radulloviqin të paraqesë publikisht dokumentacionin me të cilin i mbështet pretendimet e tij.

Duke iu referuar edhe përplasjeve të mëparshme politike në Budva dhe arrestimit të tij të dikurshëm, ministri tha se as atëherë nuk e kanë thyer. “Nuk do të më heshtin. Nuk do të më frikësojnë. Dhe nuk do ta ndalin reformën e Ushtrisë së Malit të Zi”, përfundoi Krapoviq, duke i dërguar DPS-së mesazhin se koha e tyre ka kaluar.