Kristian Vigenin: Nëse Maqedonia dëshiron të jetë anëtare e BE-së, ajo duhet të marrë mbështetjen e qytetarëve bullgarë

Eurodeputeti bullgar nga grupi i Aleancës Progresive të Socialistëve dhe Demokratëve, Kristian Vigenin thotë se nëse Maqedonia dëshiron të jetë anëtare e BE-së, ajo duhet të marrë mbështetjen e qytetarëve bullgarë.

“Nëse Republika e Maqedonisë së Veriut dëshiron të jetë anëtare e Bashkimit Evropian, nuk mjafton që përfaqësuesit e saj të vizitojnë kryeqytetet evropiane dhe të kërkojnë rrugë për në Parlamentin Evropian. Ata duhet të fitojnë mbështetjen e qytetarëve bullgarë dhe nuk duhet ta nënvlerësojnë këtë çështje”, deklaroi eurodeputeti bullgar, Vigenin për “BNT”.

Sipas eurodeputetit, rezultatet e anketës që ai porositi nga agjencia lokale “Myara” tregojnë se qytetarët bullgarë në parim mbështesin zgjerimin e Bashkimit Evropian, por qëndrimi i tyre ndaj vendeve kandidate individuale është i ndryshëm.

Ai thotë se mbizotërojnë qëndrimet pozitive, me përjashtim të Maqedonisë dhe veçanërisht Ukrainës, ndaj së cilës qëndrimi është më negativ.

Vigenin theksoi se në vitet e fundit, marrëdhëniet midis Bullgarisë dhe Maqedonisë nuk janë qetësuar dhe normalizuar, por janë zhvilluar në drejtim të kundërt.

Sipas tij, Maqedonia duhet të bëjë përpjekje për të ndryshuar mënyrën se si vendi perceptohet në Bullgari./Telegrafi/