Kroacia: Brexit nuk do ta ndalë zgjerimin e BE-së në Ballkan

Brexit është një goditje për unitetin e BE-së në një moment të keq dhe kjo tregon pakënaqësinë e votuesve britanikë për funksionimin e bllokut, deklaroi sot ministri i Jashtëm kroat, Miro Kovaç.

I pyetur në lidhje me efektin e Brexit-it për zgjerimin e BE-së, Kovaç tha se ”Kroacia ende dëshiron që vendet e Ballkanit të bëhen pjesë e unionit, por parashikojmë se do të ketë një ngadalësim të procesit”.

“Kjo është një goditje për unitetin e BE-së, që duhet të thuhet në mënyrë të qartë”, u shpreh Kovaç për N1TV.

“Tani duhet të shohim se si do të organizohet BE-ja në një mënyrë më efikase, se si do të riformohet…, pasi institucionet e BE-së janë shumë larg së qenurit një trup i vetëm”, theksoi ai.

Kovaç shtoi se “Brexit ndodhi në momentin më të keq duke qenë se ne ende nuk kemi gjetur një zgjidhje të krizës së emigrimit dhe borxhit”.