Kryeprokurori i Suedisë vizitë në Shqipëri, do të takohet me ministrin Manjani

Autoriteti i Prokurorisë Suedeze aktualisht po drejton planifikimin e një programi bashkëpunimi e zhvillimi ndërmjet Suedisë dhe Shqipërisë në fushën e drejtësisë për të mitur.

Prokurori i Përgjithshëm i Suedisë, Anders Perklev, po viziton Shqipërinë në datat 2 dhe 3 maj, ku do të realizojë disa takime me zyrtarë të lartë të vendit.

Burimet zyrtare nga Ministria e Drejtësisë e Shqipërisë konfirmuan se takimi me ministrin Manjani do të realizohet nesër. Gjithashtu më 3 maj do të realizohet edhe takimi me prokurorin e Përgjithshëm të Shqipërisë, Adriatik Llalla.

Sipas një njoftimi zyrtar nga Ambasada e Suedisë në Tiranë, mësohet se Autoriteti i Prokurorisë Suedeze aktualisht po drejton planifikimin e një programi bashkëpunimi e zhvillimi ndërmjet Suedisë dhe Shqipërisë në fushën e drejtësisë për të mitur.

Sipas ambasadës, vizita e Perklevit do të shërbejë për të përforcuar mbështetjen për këtë program. Anders Perklev është Prokuror i Përgjithshëm i Suedisë që nga viti 2008. Gjatë vitit 2015, Perklev ka patur edhe detyrën e presidentit të Rrjetit të Prokurorëve Publikë apo institucioneve ekuivalente në Gjykatën e Lartë të Drejtësisë të Bashkimit Europian.

Kujtojmë se disa ditë më parë Shqipërinë e vizitoi edhe prokurori Federal i Belgjikës, Frederic Van Leeuw.