Kultivuan 355 bimë narkotike në Fushë-Arrëz, bien në pranga dy persona

Dy persona janë vënë në pranga nga Policia, pasi dyshohet se janë autorët e kultivimit të disa bimëve narkotike në fshatin Apripë e Gurit, Fushë-Arrëz.

Sipas raportimeve të Policisë, në pranga kanë rënë E. P., 20 vjeç, dhe S. J., 50 vjeç, të cilët dyshohet se kanë kultivuar 355 bimë narkotike, të cilat u asgjësuan nëpërmjet djegies nga Policia.

“Shërbimet e Komisariatit të Policisë Pukë, nën drejtimin e Prokurorisë dhe në bashkëpunim me Forcat Operacionale, në vijim të një hetimi disa-javor, të kryer me metoda proaktive, për goditjen e veprimtarisë kriminale në fushën e kultivimit të bimëve narkotike, finalizuan operacionin policor të koduar “Gurra”.

Si rezultat i operacionit, u identifikuan dhe u arrestuan në flagrancë shtetasit:

• E. P., 20 vjeç; dhe S. J., 50 vjeç, të dy banues në fshatin Aprip e Gurit, Fushë Arrëz.

Nga veprimet hetimore të kryera, dyshohet se këta shtetas, në tokë publike, në fshatin Aprip e Gurit, kanë kultivuar 355 bimë të dyshuara narkotike Cannabis Sativa. Bimët e dyshuara narkotike u asgjësuan me anë të djegies”, thuhet në njoftimin e policisë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.