Kurti: Pas dy ditësh presim vendimin në Hagë, besojmë se do të kthehen në vendin e tyre e pranë familjes

Kryeministri i Kosovës, Albin Kurti ka folur për vendimin e pritshëm të Gjykatës Speciale në Hagë ndaj ish-drejtuesve të Ushtrisë Çlirimtare të Kosovës (UÇK), Hashim Thaçi, Jakup Krasniqi, Rexhep Selimi dhe Kadri Veseli.

Kurti gjatë mbledhjes solemne të Qeverisë ka thënë se Kosova, dy ditë para shpalljes së vendimit, po e pret me vëmendje verdiktin e Gjykatës.

Sipas tij, për Kosovën është e qartë se rezistenca dhe lufta e UÇK-së kanë qenë të drejta dhe çlirimtare, në përballje me një pushtues që, siç tha ai, kreu krime lufte, krime kundër njerëzimit dhe gjenocid.

“Pas dy ditësh Kosova, e të gjithë presim vendimin në Gjykatën Speciale në Hagë për drejtuesit e Ushtrisë Çlirimtare të Kosovës, Hashim Thaçi, Jakup Krasniqi, Rexhep Selimi dhe Kadri Veseli. Për ne është gjithçka e qartë. Populli i Kosovës, rezistenca dhe lufta jonë ka qenë e drejtë çlirimtare dhe kundër një pushtuesi i cili kreu krime lufte, krime kundër njerëzimit dhe gjenocid”, ka shtuar ai.

Kurti ka shprehur besimin dhe urimin që edhe verdikti që pritet të shpallet të mërkurën të jetë, sipas tij, në përputhje me këtë të drejtë.

“Besojmë dhe urojmë që edhe verdikti i së mërkurës të jetë në përputhje me këtë të drejtë, të kthehen në vendin e tyre e pranë familjes”, ka përfunduar Kurti. /Telegrafi/