Kurti pranon takim me të vetëm në mbledhjen e dy qeverive

Kryeministri Edi Rama ka nënkuptuar se këtë të enjte do të shkojë në Prishtinë.

I pyetur nga gazetarët pas deklaratave të kryeministrit të Kosovës Albin Kurti se me Ramën takohet vetëm në kuadër të mbledhjes së dy qeverisë, kryeministri refuzoi të përgjigjet, por tha se “do të flas kur të jetë koha për të folur, do të flas nesër në Prishtinë”.

Më herët, kreu i qeverisë së Kosovës theksoi se do ta takojë homologun e tij gjatë vizitës në Prishtinë, vetëm nëse zhvillohet mbledhje e dy qeverive dhe jo pa realizimin e saj.

Ai e konsideron të nevojshme këtë mbledhje, duke qenë se u anulua pa arsye, ndërsa thekson se nëse Rama insiston në anulimin e saj, ai ngelet në qëndrimin e mëparshëm.

“Është për mua e nevojshme që ta kemi mbledhjen e dy qeverive. Për takime me të ne të dyve ne kemi kontakt të drejtpërdrejtë. Është në tetor procesi i Berlinit, shumë mirë që i bën këto përgatitje, por të mos vonojmë edhe më tutje për mbledhjen. Nëse kryeministri insiston në anulimin e mbledhjes së dy qeverive atëherë unë ngelem në qëndrimin që ia kam thënë se për takime të ne të dyve ne. Nuk lëngon raporti Kosovë Shqipëri pse nuk takohen kryeministri i Kosovës dhe Shqipërisë, por për shkak se mbledhjet e dy qeverive tona janë anuluar paarsyeshëm. Unë jam i gatshëm të takohem me kryeministrin Rama në kuadër të mbledhjes së dy qeverive, jo në takime të tjera”.

Mbledhja e dy qeverive, Kosovë-Shqipëri, do të mbahej më 14 qershor në qytetin e Gjakovës, por u anulua nga Rama për shkak të situatës në veri të Kosovës.