Kuvendi mblidhet në seancë plenare, opozita thërret në interpelancë Ramën dhe ministrat

Kuvendi mblidhet këtë të enjte në seancë plenare, ku në rendin e ditës janë përfshirë disa çështje që pritet të shoqërohen me debate politike dhe përplasje mes mazhorancës dhe opozitës.

Në fokus të seancës do të jenë interpelancat e kërkuara me kryeministrin Edi Rama dhe disa ministra të kabinetit qeveritar, si edhe mocioni me debat për raportin e Departamentit Amerikan të Shtetit mbi klimën e investimeve në Shqipëri.

Kryeministri Edi Rama është thirrur në interpelancë nga deputeti Tritan Shehu, i cili deklaroi se qëllimi i saj është sqarimi i sfidave të vendit dhe i problematikave të evidentuara në raportet ndërkombëtare.

Interpelanca janë parashikuar edhe me: Zëvendëskryeministren Albana Koçiu, kërkuar nga deputetët Agron Shehaj dhe Erald Kapri; Ministrin e Financave, Petrit Malaj, kërkuar nga deputeti Enno Bozdo; Ministrin e Shtetit për Pushtetin Vendor, Ervin Demo, kërkuar nga deputeti Erion Braçe si dhe Ministrin e Brendshëm, Besfort Lamallari, kërkuar nga deputeti Erion Braçe, si edhe nga deputetët Agron Shehaj dhe Erald Kapri.

Seanca pritet të nisë në orën 10:00 me miratimin e procesverbalit të mbledhjes së kaluar dhe njoftimet procedurale, për t’i lënë më pas vend diskutimeve politike.

Debati pritet të përqendrohet te ekonomia, korrupsioni, klima e biznesit dhe standardet që kërkohen në procesin e integrimit europian.

Deputetët do të shqyrtojnë gjithashtu edhe projekt-rezolutën “Për procesin e anëtarësimit të Republikës së Shqipërisë në Bashkimin Europian”.