Kuvendi rrëzon kërkesën e PD për interpelancë për projektin “Smart City”. Balliu: Cenon sigurinë kombëtare, nuk është investim për sigurinë publike

Kuvendi ka rrëzuar sot në seancë plenare kërkesën e PD për interpelancën për projektin “Smart City”. Sipas kryeparlamentarit Niko Peleshi, objektet e paraqitura nuk lidhen drejtpërdrejt me veprim apo mosveprim të Këshillit të Ministrave, por mbështeten në raportime mediatike, emisione investigative dhe pretendime nga palë të treta.

Në fjalën e mbajtur nga foltorja e Kuvendit, nënkryetari i Komisionit të Punëve të Brendshme, Klevis Balliu, ka akuzuar mazhorancën se i mohuan sërish opozitës interpelancën për projektin e njohur si “Smart City”, pasi sipas tij, natyra e projektit është e dyshimtë.

“Ky projekt nuk është thjesht një investim për sigurinë publike, por krijimi i sistemit më të madh të survejimit masiv në historinë e Shqipërisë. Do të instalohet një rrjet me mijëra kamera inteligjente, sisteme njohjeje automatike të targave dhe monitorim me inteligjencë artificiale në 20 qytete të vendit”, deklaroi Balliu.

Deputeti demokrat paralajmëroi gjithashtu rreziqet që lidhen me kompaninë që implementon projektin.

“Shqipëria, një vend anëtar i NATO-s, po instalon një rrjet gjigant survejimi përmes një kompanie për të cilën vetë Kongresi Amerikan ka ngritur shqetësime serioze”, shtoi Balliu, duke kritikuar mungesën e analizës së rrezikut të sigurisë kombëtare dhe konsultimeve me aleatët strategjikë.

Ai nënvizoi se qeveria nuk ka garantuar as ruajtjen dhe as administrimin e të dhënave të qytetarëve shqiptarë. Balliu e quajti projektin si “korruptiv dhe kriminal, i ndërtuar mbi fshehtësi, survejim masiv dhe kapje të institucioneve shtetërore”.