Lënda plasëse shpërtheu në derën e banesës së një 72-vjeçari, shpallen në kërkim 3 vëllezërit (EMRAT)

Zbardhet ngjarja e ndodhur në orët e para të mëngjesit të 8 gushtit në lagjen “Tufinë”, ku një sasi lënde plasëse shpërtheu në derën e banesës së një 72-vjeçari, duke shkaktuar dëme të pakta materiale.

Policia ka shpallur në kërkim tre vëllezër, të identifikuar si Ervis Alla 39 vjeç, Altin Alla 43 vjeç dhe Maksim Alla 41 vjeç, të tre me precedentë të mëparshëm penalë. Ata dyshohen për veprën penale “Shkatërrimi i pronës me eksploziv”, kryer në bashkëpunim.

Sipas hetimeve, tre vëllezërit dyshohet se rreth orës 00:30 kanë vendosur dhe shpërthyer lëndën plasëse në derën e banesës së shtetasit J. M., për motive të dobëta.

Pas njoftimit për ngjarjen, shërbimet e Komisariatit të Policisë Nr. 4 organizuan operacionin e koduar “Motivi”. Këqyrja e vendit të ngjarjes, administrimi i provave dhe veprimet hetimore çuan në identifikimin e autorëve të dyshuar.

Policia vijon punën për lokalizimin dhe arrestimin e tre personave të shpallur në kërkim, si dhe për dokumentimin e plotë të rrethanave të ngjarjes.

Materialet procedurale i janë referuar Prokurorisë së Tiranës për veprime të mëtejshme.