Libi, milicitë marrin nën kontroll aneksin e banimit të ambasadës së SHBA

Një grup i milicisë islamike në Libi thotë se ka marrë në kontroll aneksin  e banimit të ambasadës amerikane në Tripoli, një muaj pas largimit të diplomatëve amerikanë për shkak të përleshjeve të dhunshme midis milicive rivale në kryeqytetin libian.

Agjencitë e lajmeve njoftojnë se grupi i milicive islamike i quajtur Agimi i Libisë, tha se prej një jave është në kontroll të kompleksit, të cilin ia ka marrë një milicie rivale pas disa javësh luftime për kontrollin e Tripolit dhe aeroportit të tij ndërkombëtar.

Rrjeti televiziv Al Arabiya me qendër në Dubai transmetoi një video që tregonte luftëtarët e milicisë islamike duke u hedhur në pishinë nga çatia e objektit amerikan.

Ambasadorja amerikane në Libi, Deborah Jones, tha se pamjet duket se janë filmuar në aneksin e banimit së ambasadës. Ajo tha se nuk duket që ambasada të jetë plaçkitur.

Diplomatët amerikanë u larguan në Tunizinë fqinje në fund të korrikut për shkak të përleshjeve në Tripoli. SHBA thanë se do të pezullonin operacionet derisa të garantohej siguria.