Përfaqësues të shoqërisë civile dhe avokatë kallëzim në SPAK për dhunën në protesta: 180 episode të dokumentuara

Përfaqësues të shoqërisë civile, intelektuale, avokatë dhe studentë kanë dënuar ashpër dhunën e ushtruar nga strukturat e policisë ndaj protestuesve, duke ndërmarrë hapin e parë zyrtar ligjor.

Këtë të hënë, ata kanë dorëzuar zyrtarisht një kallëzim penal në SPAK përmes të cilit kërkojnë nisjen e hetimeve dhe vënien para përgjegjësisë ligjore të të gjithë zyrtarëve policorë që kanë ushtruar dhunë.

Sipas materialeve të dorëzuara pranë organit të akuzës, kallëzimi penal përmban mbi 180 episode të dokumentuara të paligjshmërisë dhe përdorimit të forcës gjatë tubimeve.

Sipas tyre këto raste nuk janë ngjarje të izoluara, por dëshmi të një praktike sistematike. Përballë kësaj situate, përfaqësuesit e shoqërisë civile dhe grupi i avokatëve i kanë bërë thirrje publike SPAK-ut që të kryejë një hetim sa më të shpejte, të plotë dhe të paanshëm.