“Liria Ka Emër” mban sot konferencë për media, priten detaje të reja për marshin e 1 Tetorit

Platforma qytetare “Liria Ka Emër” do të mbajë sot konferencë për media, në kuadër të aktiviteteve të paraprira për marshin e 1 Tetorit, siç njofton Klan Kosova.

Konferenca është paralajmëruar të mbahet në ora 14:00, ndërsa organizatorët pritet të japin detaje lidhur me marshin, megjithëse arsyeja e mbajtjes së konferencës nuk është bërë e ditur.

Marshi i 1 Tetorit vjen në vazhdën e angazhimeve të kësaj platforme për të kundërshtuar vendimin dënues të Gjykatës Speciale ndaj ish-krerëve të UÇK-së. Sipas platformës, 1 tetori përkon edhe me simbolikën e protestës paqësore të studentëve të Kosovës më 1 tetor 1997.

Ndërkohë në Prishtinë, protestat “Jo në emrin tim” kanë vazhduar çdo natë në Sheshin Skënderbeu, ku qytetarët janë mbledhur në shenjë solidarizimi me ish-luftëtarët.