Letër krerëve të shtetit: Qendra “Gjenocidi në Kosovë” kërkon sërish zhbërjen e Speciales

Qendra “Gjenocidi në Kosovë – Plagë e Hapur” i ka drejtuar një letër krerëve të shtetit të Kosovës, përmes së cilës kërkon shpalljen e gjendjes së jashtëzakonshme dhe zhbërjen e Dhomave të Specializuara të Kosovës dhe Zyrës së Prokurorit të Specializuar, siç njofton Klan Kosova. Letra u është adresuar kryetares së Kuvendit dhe ushtrueses së detyrës së Presidentes, Albulena Haxhiut, kryeministrit Albin Kurti, deputetëve të Kuvendit të Kosovës dhe kryetarëve të partive politike.

Sipas Qendrës, vendimi i 16 shtatorit përbën “një goditje të rëndë ndaj dispozitave themelore të Kushtetutës së Kosovës”. Letra, sipas raportimit të Klan Kosovës, mbështetet në deklaratën e 28 shtatorit, e miratuar nga 99 deputetë të Kuvendit të Kosovës.

Qendra hedh dyshime mbi përbërjen e Panelit të Apelit të caktuar më 29 shtator, duke theksuar se gjyqtarët e përzgjedhur kanë gjykuar më parë çështjet e Hysni Gucatit, Nasim Haradinajt, Salih Mustafës dhe Pjetër Shalës. “Prandaj rezultati i vendimit të Panelit të Apelit është DÉJÀ VU!”, thuhet në letër.

Në letër kërkohet që gjendja e jashtëzakonshme dhe abrogimi i nenit 162 të Kushtetutës të trajtohen si “imperativ kategorik”. “Vetëm zhbërja e Dhomave të Specializuara dhe Zyrës së Prokurorit të Përgjithshëm mund të shpëtojë Kosovën nga rreziku i madh që i kanoset”, përfundon letra, sipas Klan Kosovës.