Live- “Sfida kryesore, zbatimi i reformave dhe mbyllja e kapitujve”, Rama krah Costës: Shqipëria duhet të vazhdojë me të njëjtin ritëm drejt anëtarësimit në BE

Kryeministri Edi Rama deklaroi sot se Shqipëria duhet të vazhdojë me të njëjtin ritëm në procesin e anëtarësimit në BE. Rama zhvilloi një konferencë të përbashkët për shtyp me Presidentin e European Council, António Costa, gjatë së cilës vlerësoi mbështetjen e vazhdueshme të tij për procesin e integrimit europian të Shqipërisë.

Kreu i qeverisë shqiptare e cilësoi Costën si një personalitet me përvojë të madhe dhe njohje të thellë të çështjeve europiane dhe ndërkombëtare, duke theksuar se çdo takim me të është një mundësi për të mësuar.

“Dua ta falënderoj Antonion për angazhimin e vazhdueshëm dhe mbështetjen e palodhur përpara se ne të realizonim përmbylljen e fazës së parë dhe hapjen e fazës së mbylljes së kapitujve, në një kohë kur të gjithë së bashku përballemi me sfida që nuk janë individuale, por të përbashkëta”, tha Rama.

Ai nënvizoi se Shqipëria dhe Costa ndajnë të njëjtin qëndrim se pjesa më e rëndësishme e procesit të integrimit mbetet puna që duhet të bëjë vetë vendi.

“Kemi detyra për të përmbushur jo për hir të Brukselit apo Parisit, por për hir të performancës së institucioneve dhe të pushteteve të pavarura në Shqipëri”, u shpreh ai.

Rama theksoi bindjen e përbashkët me Presidentin e Këshillit Europian se “pjesa kryesore e punës është puna jonë”.

“Në këtë fazë, theksi kryesor është zbatimi i atyre reformave që janë kryer me sukses apo këtyre ligjeve. Natyrisht që është një proces me shumë sfida. Me të drejtë Presidenti na ka sugjeruar që të rrisim përpjekjet për të njohur publikun e gjerë me të gjitha këto sfida që shoqërojnë çdo hap që ne hedhim përpara. Kemi folur për eksperiencën e Portugalisë, të fermerëve, të prodhuesve të verës, për sfidat që ata patë për t’u adaptuar, por pastaj të pasuara me shumë sukses dhe rezultatet të mira për fermat e tyre.Ne kemi dakordësi 100% në të gjitha çështjet. Për sa i përket detyrave që ne duhet të bëjmë, për sa i përket domosdoshmërisë që të ecim me këtë ritëm dhe të fillojmë me mbylljen e kapitujve”, deklaroi Rama.