Gjykata e Lartë mbështet sërish republikanët në përplasjen për tarifat e reklamave politike

Gjykata e Lartë e Shteteve të Bashkuara u rreshtua sërish të mërkurën në anën e republikanëve në përplasjen për politikën e re të Komisionit Federal të Komunikimeve (FCC), e cila u jep komiteteve të partive qasje në tarifat e zbritura të reklamave televizive dhe radiofonike, të rezervuara prej kohësh për kandidatët politikë, siç njofton Reuters.

Gjykata pranoi që FCC-ja, e drejtuar nga Brendan Carr, aleat i presidentit Donald Trump, të shmangë një afat të vendosur nga gjykata që do ta detyronte agjencinë të vendoste mbi ankesën demokrate kundër politikës përpara zgjedhjeve të mesmandatit të 3 nëntorit. Kërkesën në Gjykatën e Lartë e paraqitën bashkërisht FCC-ja dhe dy komitete republikane, sipas Reuters.

Gjykata ka shumicë konservatore 6 me 3. Gjyqtaret liberale Sonia Sotomayor dhe Ketanji Brown Jackson sinjalizuan se do ta kishin refuzuar kërkesën. FCC-ja, e cila aktualisht ka shumicë republikane 2 me 1, e ndryshoi në mars rregullin e ashtuquajtur “tarifa më e ulët për njësi”, në një lëvizje që shihet si ndihmë për republikanët e presidentit Trump, të cilët kërkojnë të ruajnë kontrollin e Kongresit në zgjedhjet e 3 nëntorit.

Kryegjyqtari John Roberts e kishte hequr më parë afatin e 9 tetorit të vendosur nga Gjykata e Apelit e Qarkut të Katërt në Richmond, e cila e ka akuzuar FCC-në për “taktika vonese” të përsëritura dhe ka theksuar nevojën për një vendim urgjent, duke pasur parasysh afrimin e zgjedhjeve. Më 7 tetor, Qarku i Katërt i urdhëroi FCC-së të vendoste shpejt mbi ankesën demokrate, të paraqitur më shumë se pesë muaj më parë.

Kjo është hera e dytë në javët e fundit që Gjykata e Lartë merret me politikën e FCC-së, ndërsa komitetet kryesore republikane shkojnë drejt mesmandatit me avantazh të qartë financiar ndaj homologëve demokratë. Në shtator, gjykata ringjalli politikën pasi Qarku i Katërt e kishte bllokuar, duke vendosur 8 me 1 se kandidatët demokratë duhet të presin vendimin e FCC-së përpara se ta sfidojnë në gjykatë.

Politika në fjalë u kërkon transmetuesve të aplikojnë tarifa të zbritura për reklama të caktuara politike brenda 60 ditëve para zgjedhjeve të përgjithshme — dritare që këtë vit u hap më 4 shtator. Një grup kandidatësh demokratë, përfshirë senatorin Jon Ossoff të Xhorxhias, e sfiduan politikën në prill në procedurat e brendshme të FCC-së. Çështja ka fituar peshë edhe pas vendimit të qershorit të Gjykatës së Lartë që rrëzoi kufizimet federale për shpenzimet e koordinuara mes partive dhe kandidatëve të tyre: që atëherë, dy komitetet republikane i kanë tejkaluar tavanet e dikurshme kombëtare me më shumë se 48 milionë dollarë, kundrejt më pak se 4 milionë dollarëve nga demokratët, ndërsa tre komitetet kryesore republikane mbyllën gushtin me rreth 233 milionë dollarë para në dorë, kundrejt rreth 130 milionë dollarëve të demokratëve, të cilët mbajnë edhe gati 18 milionë dollarë borxh, siç njofton Reuters.