LVV i drejtohet Gjykatës Kushtetuese për kompetencat e Haxhiut pas skadimit të mandatit
Deputeti Adnan Rrustemi, në emër të 31 deputetëve të Lëvizjes Vetëvendosje, ka dorëzuar sot në Gjykatën Kushtetuese kërkesën për sqarimin e kompetencave presidenciale pas përfundimit të gjashtë muajve të ushtrimit të detyrës nga Albulena Haxhiu.
Lëvizja Vetëvendosje i është drejtuar Gjykatës Kushtetuese për të kërkuar sqarim se kush do t’i ushtrojë kompetencat e presidentit pas përfundimit të periudhës gjashtëmujore të ushtrimit të detyrës nga Albulena Haxhiu, raporton KosovaPress.
Në bazë të dokumentit që ka siguruar KosovaPress, kërkesa është dorëzuar më 6 tetor nga deputeti Adnan Rrustemi, në emër të 31 deputetëve të LVV-së.
Në kërkesë kërkohet të sqarohet situata që mund të krijohet nëse presidenti i ri nuk zgjidhet dhe Kuvendi shpërndahet për shkak të moszgjedhjes së presidentit. Një nga çështjet kryesore është kush do t’i shpallë zgjedhjet e parakohshme, pasi kjo është një nga kompetencat e presidentit.
Deputetët e LVV-së kërkojnë që Gjykata të sqarojë se si do të vazhdojnë institucionet dhe procesi zgjedhor pas përfundimit të gjashtë muajve të ushtrimit të detyrës nga Haxhiu. Kërkesa e deputetëve është bërë një ditë pasi edhe vetë ushtruesja e detyrës së presidentes, Albulena Haxhiu, iu drejtua Gjykatës Kushtetuese për të njëjtën çështje, sipas KosovaPress.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.