Makina gjendet në Bovillë, por jo ai! Policia në ndjekje të 39-vjeçarit që vrau të riun në Paskuqan

9 qershor 2026 – Policia e Tiranës vijon ende kërkimet për 39-vjeçarin Sadik Llani, autor i dyshuar i vrasjes së 27-vjeçarit Ardian Baloshi, ngjarje e ndodhur mesditën e djeshme në Paskuqan.

Sipas verifikimeve të kamerave të sigurisë, policia ka arritur të gjurmojë itinerarin e tij në drejtim të liqenit të Bovillës. Forcat RENEA kanë kryer kontrolle gjatë natës në rreth 15 objekte, raporton gazetari Besar Bajraktaraj, por nuk kanë gjetur gjurmë të personit që ekzekutoi me kallash të riun.

Përveç zonës së Bovillës, kontrolle janë ushtruar edhe në zonën malore të Krujës. Operacionet e RENEA-s pritet të vijojnë edhe gjatë kësaj të marte.

Policia ka gjetur automjetin e autorit të braktisur pranë liqenit të Bovillës, por brenda tij nuk janë gjetur sende të kundërligjshme, as arma e krimit. Për zbardhjen e ngjarjes, policia ka marrë në pyetje 8 persona, të cilët nuk kanë dhënë detaje të vlefshme për grupin hetimor.

Krimi ndodhi për motive banale, pas një sherri mes viktimës e autorit në një kalçeto.

Policia e konsideron Llanin një person me rrezikshmëri të lartë shoqërore e prandaj ka vënë shpërblim 10 mijë euro për këdo që ndihmon me informacion për vendndodhjen e tij.

---