Mali i Tomorit, vendi i shenjtë ku besimi, tradita dhe drita bëhen një

Maja e Malit të Tomorit është ndriçuar mbrëmjen e kaluar nga fishekzjarret, në kuadër të ditëve të pelegrinazhit bektashi.

Kryeministri Edi Rama ndau pamje nga atmosfera festive në majën e Tomorit, duke e cilësuar këtë vend si një hapësirë ku prej brezash ndërthuren besimi, tradita dhe simbolika shpirtërore.

“Vendi i shenjtë, ku prej brezash besimi, tradita dhe drita bëhen një”, shprehet Rama.

Ditët e pelegrinazhit në majën e Malit të Tomorit, konsiderohen ditë të shenjta për besimtarët bektashinj dhe çdo vit mbledhin mijëra pelegrinë nga Shqipëria, diaspora dhe vende të ndryshme të botës.

Besimtarët vendosin çadrat e tyre në këtë zonë, zhvillojnë ritualet tradicionale të festës dhe ngjiten në këmbë drejt majës së Malit të Tomorit.

Mali i Tomorit ka një rëndësi të veçantë për komunitetin bektashi. Sipas traditës, në këtë mal ndodhet varri i Abaz Aliut, figurë e rëndësishme e besimit bektashi dhe pjesë e traditës shpirtërore e kulturore shqiptare.

Megjithatë, ekzistojnë edhe versione të tjera historike që e vendosin varrin e Abaz Aliut në Qerbela. Pavarësisht këtyre interpretimeve, figura e tij mbetet një prej simboleve më të rëndësishme të pelegrinazhit bektashi në Malin e Tomorit.

Pelegrinazhi në Tomor është kthyer ndër vite në një ngjarje që ndërthur dimensionin fetar me traditën dhe trashëgiminë kulturore, duke tërhequr çdo vit mijëra vizitorë.