Mali i Zi mund të marrë një komisar në Bruksel para hyrjes në BE

Zyrtarë të lartë të Bashkimit Evropian po shqyrtojnë rritjen e përfshirjes së anëtarëve të rinj gjatë fazës përfundimtare të rrugës së tyre drejt Unionit, sipas drafteve të dokumenteve që ka parë media brukselse Rapporteur, siç shkruan gazeta malazeze Dan. Lajmi u raportua edhe nga RTCG.

Ideja është përfshirja më e thellë e vendeve kandidate pasi të nënshkruajnë traktatin e anëtarësimit, por para se të 27 vendet anëtare të përfundojnë procedurat kombëtare të ratifikimit — një proces që mund të zgjasë me vite. “Tani, kur erërat politike po ndryshojnë në gjithë Evropën, është plotësisht e arsyeshme të pritet që ajo periudhë të jetë më e gjatë… E gjithë ideja është ta zgjasim atë periudhë, sepse në raundet e mëparshme të zgjerimit ishte mjaft e shkurtër,” tha Steven Blockmans, zëvendësdrejtor i Qendrës Ndërkombëtare për Mbrojtje dhe Siguri në Talin.

Sipas një dokumenti të brendshëm të Komisionit, të cituar nga Rapporteur: “Komisioni e sheh të arsyeshme të shqyrtojë mundësinë që shteti që i bashkohet Unionit të emërojë gjithashtu një komisar gjatë kësaj periudhe… Një komisar i tillë mund të marrë pjesë në punën e Kolegjit për çështje relevante, duke ruajtur plotësisht autonominë, kolegjialitetin dhe përgjegjësinë kolektive të Kolegjit.” Komisari i ri do të ndihmonte në formësimin e legjislacionit të BE-së — një e drejtë e rezervuar deri tani vetëm për zyrtarët e vendeve anëtare.

Nëse kjo do të realizohej, do të ishte hera e parë në historinë e Unionit që një komisar do ta merrte detyrën në ndërtesën Berlaymont në Bruksel para se vendi i tij të bëhej formalisht anëtar i BE-së. Si në raundet e mëparshme të zgjerimit, pasi një kandidat nënshkruan traktatin e anëtarësimit, ai mund të dërgojë vëzhgues në Parlamentin Evropian. Komisioni po shqyrton gjithashtu një shkallë pjesëmarrjeje institucionale edhe në një fazë më të hershme, pasi negociatat e anëtarësimit të kenë përfunduar formalisht — vendet mund të dërgonin vëzhgues, potencialisht edhe zyrtarët e tyre më të lartë shtetërorë, në Këshillin Evropian.

Presidentja e Komisionit Evropian, Ursula von der Leyen, nisi të mërkurën vizitën në Ballkanin Perëndimor, duke e nisur nga Tirana, në një kohë kur Komisioni po përgatit një ofertë më të gjerë për t’i afruar vendet kandidate me Unionin para anëtarësimit të plotë. Komisioni do t’u ofrojë kandidatëve integrim gradualisht më të thellë në tregun e përbashkët, teksa ato zbatojnë reformat e brendshme: pagesat SEPA, programi kërkimor “Horizon”, sistemi i tregtimit të emetimeve, shërbimet dixhitale publike, nismat e sigurisë kibernetike dhe projektet IPCEI. “Siguria dhe mbrojtja duhet të jenë ndër prioritetet e para të integrimit gradual më të thellë”, thuhet në dokumentin e Komisionit Evropian.