Marrëdhëniet SHBA-Turqi përballen me çështje të nxehta, Erdogan merr komplimentet e Trumpit por jo avionët F-35

Presidenti amerikan Donald Trump ka shprehur vlerësime të forta për homologun turk Rexhep Tajip Erdogan gjatë takimeve në Nju Jork, duke e cilësuar atë si një lider të fortë dhe një mik.

Megjithatë, përtej deklaratave miqësore, çështjet kryesore që Ankaraja kërkon të zgjidhë me Uashingtonin mbeten ende të hapura.

Në qendër të tyre janë rikthimi i Turqisë në programin e avionëve luftarakë F-35 dhe furnizimi me motorë për avionët luftarakë turq KAAN.

Sipas raportimeve nga mediat e huaja, Ankara mbetet jashtë programit F-35 për shkak të blerjes së sistemit rus S-400, që ka sjellë sanksione amerikane sipas ligjit CAATSA.

Deri tani, nuk ka pasur një njoftim për heqjen e këtyre kufizimeve. Në të njëjtën kohë, Turqia ka konkretizuar një marrëveshje të rëndësishme ekonomike me SHBA-në.

Turkish Airlines ka nënshkruar një marrëveshje për blerjen e 100 avionëve Boeing 737-8, me mundësi për 50 avionë të tjerë të familjes Boeing 737 MAX.

Erdogan dhe Trump nuk zhvilluan një takim të veçantë dypalësh në Nju Jork, ndërsa çështjet më të ndjeshme të marrëdhënieve mes dy vendeve duket se mbetën jashtë diskutimeve publike.

Mes tyre janë S-400, programi F-35 dhe motorët amerikanë për KAAN.

Edhe ambasadori amerikan në Turqi, Tom Barrack, e përshkroi marrëdhënien mes dy liderëve si të karakterizuar nga respekt dhe harmoni, duke theksuar njëkohësisht se çështja e sanksioneve CAATSA kërkon ende kohë.

Kështu, ndërsa retorika mes Trumpit dhe Erdoganit mbetet miqësore, marrëdhëniet amerikano-turke vazhdojnë të përballen me çështje të rëndësishme strategjike që ende nuk kanë gjetur një zgjidhje.