KAZAKISTAN – Nëntë ushtarakë humbin jetën gjatë manovrave detare në Kaspik

MANGYSTAY (Kazakistan), 24 shtator /ATSH-Kazinform/ – Nëntë pjesëtarë të forcave detare të Kazakistanit kanë humbur jetën pas një incidenti gjatë stërvitjeve ushtarake në detin Kaspik, në rajonin Mangystau.

Lajmi është konfirmuar nga Ministria e Mbrojtjes e Kazakistanit.

Sipas të dhënave paraprake, 19 ushtarakë humbën në det pasi kushtet atmosferike u përkeqësuan papritur gjatë një misioni stërvitor luftarak.

Ushtarakët po merrnin pjesë në një stërvitje të organizuar nga Forcat Detare të Forcave të Armatosura të Kazakistanit, në bregdetin e Kaspikut.

“Me keqardhje të thellë njoftojmë se sot gjatë stërvitjeve të zhvilluara nga Forcat Detare të Forcave të Armatosura të Republikës së Kazakistanit në bregdetin e detit Kaspik, ushtarakët që po kryenin një mision stërvitor luftarak u morën nga dallgët pas përkeqësimit të papritur të kushteve atmosferike dhe forcimit të erërave”, thuhet në deklaratën e Ministrisë së Mbrojtjes.

Ministria konfirmoi se nëntë ushtarakë kanë humbur jetën, ndërsa tre të tjerë janë shpëtuar.

Njëri prej të shpëtuarve është dërguar në spital për trajtim mjekësor.

Kërkimet për pjesëtarët e mbetur po vazhdojnë.

Një operacion i gjerë kërkim-shpëtimi është vënë në zbatim, ku marrin pjesë njësi të Forcave Detare, personel i Ministrisë së Situatave të Emergjencave, mjete ajrore dhe shërbime të tjera përkatëse. Ekipet janë dërguar menjëherë në vendngjarje për të ndihmuar në kërkimet dhe shpëtimin e personave të zhdukur.

Një komision i drejtuar nga ministri i Mbrojtjes, gjenerallejtënant i Aviacionit Dauren Kosanov, është dërguar në vendin e incidentit. Komisioni do të hetojë rrethanat e ngjarjes dhe do të bashkërendojë përpjekjet e shpëtimit.

Ministria e Mbrojtjes i shprehu ngushëllimet familjeve dhe të afërmve të ushtarakëve të ndjerë. Ajo deklaroi se familjeve do t’u ofrohet ndihma dhe mbështetja e nevojshme.

Autoritetet kazake pritet të publikojnë informacione të mëtejshme mbi operacionin e kërkim-shpëtimit dhe gjendjen e ushtarakëve të prekur, ndërsa të dhënat e reja bëhen të disponueshme./ /Ad.Ab./ a.jor.