Marta Kos për zgjerimin e BE: Shqipëria mund të bëhet anëtare edhe para 2030-ës

Eurokomisionerja për zgjerimin tha se Shqipëria mbetet mes vendeve më të avancuara në garën për anëtarësim në Bashkimin Europian.

Eurokomisionerja për zgjerimin, Marta Kos, deklaroi se Shqipëria ka mundësi reale të bëhet anëtare e Bashkimit Europian deri në vitin 2030, madje sipas ritmit aktual edhe më herët. Ajo e përmendi Shqipërinë së bashku me Malin e Zi si dy vendet që kryesojnë procesin.

Në fjalën e saj, Kos nënvizoi se procesi i zgjerimit mbetet i bazuar te meritat dhe te përmbushja e kritereve, jo te afatet formale. Sipas saj, një vend që mbyll reformat dhe plotëson kushtet duhet të marrë të drejta të plota si anëtar i Bashkimit Europian.

Ajo u shpreh gjithashtu kundër ideve për modele të pjesshme integrimi, duke theksuar se anëtarësimi duhet të jetë i plotë dhe i barabartë. Ky qëndrim shihet si një sinjal pozitiv për Shqipërinë, në një moment kur negociatat dhe pritshmëritë për afrimin me BE-në po marrin një peshë më të madhe politike.

Burimi: RTSH