Mbajtën peng dhe kërcënuan një 70-vjeçar në shtëpinë e tij për ta grabitur, arrestohen 3 persona në Himarë

Policia e Himarës ka finalizuar operacionin e koduar “Shuma”, duke arrestuar tre persona të dyshuar për tentativën e grabitjes së një 70-vjeçari në fshatin Borsh. Në pranga ranë shtetasit: E. Xh., 25 vjeç, banues në Selenicë; K. T., 23 vjeç, banues në Vlorë dhe A. C., 19 vjeç, banues në Vlorë.

Sipas policisë, operacioni u zhvillua pas kallëzimit të bërë nga 70-vjeçari, i cili denoncoi se më 12 korrik 2026, tre persona kishin hyrë në banesën e tij, e kishin mbajtur me dhunë dhe e kishin kanosur me një imitues arme zjarri (pistoletë çakmak), me qëllim vjedhjen e një shume parash.

Nga hetimet rezultoi se autorët kishin mbajtur në vëzhgim banesën e 70-vjeçarit për dy ditë dhe kishin marrë me qira një automjet tip “Mercedes-Benz”, të cilin e përdorën për të shkuar në vendin e ngjarjes. Automjeti është sekuestruar në cilësinë e provës materiale.

Gjithashtu, nga verifikimet rezultoi se njëri prej të arrestuarve, shtetasi A. C., kishte thyer masën e sigurisë “Arrest në shtëpi”, të caktuar nga gjykata për vepra penale në fushën e narkotikëve.

Materialet procedurale i janë referuar Prokurorisë për veprime të mëtejshme.