Mbi 300 viktima dhe të plagosur pas sulmeve izraelite

Ushtria izraelite goditi më shumë se 100 lokacione “brenda 10 minutave” në Liban, në “sulmin më të madh të koordinuar” që nga fillimi i ofensivës aktuale në vend, njoftoi sot ushtria.

Njoftohet për mbi 300 viktima dhe të plagosur.

Ushtria izraelite pretendoi në një deklaratë se sulmet kishin si objektiva objekte të lidhura me Hezbollahun në disa zona të Bejrutit, Luginën Beqaa dhe në jug të Libanit.

Ushtria pretendoi se objektivat përfshinin qendra komandimi dhe kontrolli dhe infrastruktura të tjera të përdorura për të kryer sulme ndaj objektivave izraelite.

Hezbollahu nuk ka bërë koment të menjëhershëm mbi pretendimin izraelit.

Sulmet erdhën disa orë pas njoftimit të SHBA-së dhe Iranit për një armëpushim dyjavor, i cili synon të hapë rrugën për një marrëveshje përfundimtare për të ndalur luftën që Washingtoni dhe Tel Avivi nisën ndaj Teheranit më 28 shkurt, e cila ka lënë mijëra të vrarë dhe të plagosur.

Ndërmjetësuesit pakistanezë thanë se armëpushimi përfshin Libanin, ndërsa kryeministri izraelit Benjamin Netanyahu tha se nuk e përfshin. Hezbollahu deri më tani e ka respektuar armëpushimin, megjithëse sulmet izraelite vazhdojnë.

Izraeli ka kryer sulme ajrore dhe ofensivë tokësore në jug të Libanit që nga një sulm kufitar i Hezbollahut më 2 mars, pavarësisht armëpushimit që hyri në fuqi në nëntor 2024.

Autoritetet libaneze kanë thënë se të paktën 1.530 persona janë vrarë dhe 4.812 të tjerë janë plagosur nga sulmet izraelite që nga atëherë./   /os/