Mbledhja e kreut shtetëror të Maqedonisë pa asnjë përfaqësues shqiptar

Në këtë mbledhje të thirrur nga presidenti Gjorgje Ivanov nuk ishte i pranishëm asnjë përfaqësues shqiptarë.

Kreu i lartë shtetëror në Maqedoni ka diskutuar lidhur me ngjarjet e fundit, sidomos incidentin e djeshëm në postën kufitare policore Goshincë në Malësinë e Likovës pranë brezit kufitar me Kosovën.

Por në këtë mbledhje nuk ishin të pranishëm asnjë nga krerët shqiptarë të disa institucioneve, por edhe mosprania e anëtarëve të Këshillit të Sigurisë Kombëtare si ish-deputetja Flora Kadriu, profesori universitar Veli Kreci dhe gjenerali ushtarak Naser Sejdini që është edhe zëvendës shefi i shtabit të përgjithshëm të ARM-së.

Mosprania e zyrtarëve të lartë qeveritar shqiptar është për shkak të faktit se BDI konteston legjitimitetin e Ivanovit si president dhe se ajo në shenjë bojkoti nuk kishte deleguar asnjë përfaqësues të saj në institucionet e larta shtetërore. Por Ivanov edhe përkundër këtij vendimi të BDI-së dhe mosnjohjes së tij, vitin e kaluar zgjodhi tre përfaqësues shqiptar si pjesë të Këshillit të Sigurisë.

Në takimin e mbrëmshëm ishin të pranishëm kryeministri Nikola Gruevski, kryetari i Parlamentit Trajko Veljanovski, ministri i mbrojtjes Zoran Jolevski, ministrja e brendshme Gordana Jankullovska, shefi i DSK (Drejtoria e Sigurisë dhe Kundërzbulimit), Sasho Mijallkov si dhe shefi i shtabit të përgjithshëm të ARM-së, Goranço Kotevski.

Sipas komunikatës së presidencës, kreu shtetëror është mbledhur pas incidentin të djeshëm në postën policore kufitare Goshincë, kur një grup i armatosur mori ndërhyri dhe mori nën kontroll këtë postë kufitare, duke prangosur katër pjesëtarë të policisë që ishin roje kujdestare. MPB e karakterizoi këtë sulm si sulm terrorist dhe se ajo akuzoi se me këtë janë sulmuar dhe rrezikuar institucionet e shtetit.