Media ruse skeptike për fitoren e properëndimorëve

Media ruse ishte skeptike sot mbi fitoren e properëndimorëve që realizuan një rezultat prej 70 për qind të votave të zgjedhjeve legjislative në Ukrainë, duke theksuar se prania në parlament e gjashtë partive të ndryshme nuk do të kontribuojë në harmonizimin e jetës politike në vend.

“Ndërkohë që gjashtë parti pritet të hyjnë në ‘Verkhovna Rada’ (parlamenti ukrainas), sipas rezultateve të para të pjesshme, asnjë prej tyre nuk ka gjysmën e vendeve në parlament, që është e nevojshme për të qeverisur”, sipas të përditshmes ruse “Izvestia”

“Edhe blloku i presidentit Petro Poroshenko dhe fronti popullor i kryeministrit Arseni Jaceniuk, që kanë arritur rezultate të njëjta (rreth 21,6 për qind) duhet të arrijnë marrëveshje me njëra tjetrën dhe me partitë e tjera”, vazhon kjo gazetë.

“Ky diversitet i partive me siguri do të vështirësojë marrjen e vendimeve për miratimin e ligjeve të rëndësishme, dhe parlamenti do të jetë më pak i kontrolluar se më parë”, theksoi “Izvestia”.

Përveç Bllokut Petro Poroshenko dhe Frontit Popullor, Partia “Samopomitch” ka marrë 10,6 për qind, që përbëhet nga përkrahës të rinj dhe luftëtarë të kthyer nga fronti, Blloku opozitar (9,6 për qind), Partia Radikale (7,5 për qind) e populistit Oleg Liachko dhe “Batkivchtchina” e ish-kryeministres Julia Timoshenko (5,8 për qind), kto janë partitë që pritet të hyjnë në parlament.