Meloni kërkon më shumë fleksibilitet nga BE për krizën energjetike pas luftës me Iranin

Kryeministrja italiane Giorgia Meloni i ka bërë thirrje Bashkimit Evropian të lejojë fleksibilitet më të madh buxhetor për të ndihmuar familjet dhe bizneset që po përballen me rritjen e çmimeve të energjisë pas tensioneve me Iranin.

Meloni tha se i njëjti fleksibilitet fiskal që BE-ja aplikon aktualisht për shpenzimet e mbrojtjes duhet të zgjerohet edhe për masat ekonomike në mbështetje të qytetarëve.

“Nuk mund t’u themi qytetarëve se paratë janë vetëm për mbrojtje”, deklaroi ajo, duke theksuar se Evropa duhet të gjejë një ekuilibër mes sigurisë dhe mbështetjes ekonomike.

Sipas saj, qeveritë evropiane duhet të reagojnë jo vetëm ndaj sfidave të mbrojtjes, por edhe ndaj presioneve që po rëndojnë familjet dhe bizneset për shkak të kostove të larta të energjisë.

Shqetësimet për tregjet energjetike janë shtuar pas tensioneve në Lindjen e Mesme dhe rrezikut për ndërprerje në Ngushticën e Hormuzit, një nga korridoret më të rëndësishme globale për transportin e naftës dhe gazit.