Meloni letër Costës, kritikon qasjen e fragmentuar të BE-së ndaj bisedimeve të paqes në Ukrainë

Kryeministrja italiane, Giorgia Meloni ka kritikuar qasjen e pakoordinuar të BE-së ndaj negociatave të paqes me Rusinë, në një letër dërguar të enjten Presidentit të Këshillit Evropian Antonio Costa.

Meloni kritikoi faktin se udhëheqësit evropianë kanë nisur kohët e fundit disa nisma të ndryshme pa një drejtim të përbashkët ose një mandat të qartë. Letra vjen ndërsa zyrtarë nga Franca, Gjermania dhe Mbretëria e Bashkuar, e ashtuquajtura “E3”, takohen me përfaqësues nga Shtetet e Bashkuara dhe Ukraina në Bruksel për të diskutuar se si t’i jepet fund luftës.

“Të vazhdosh në rrëmujë, me nisma që ndjekin dhe mbivendosen me njëra-tjetrën, nuk do të na ndihmojë, as me partnerët tanë dhe as me ata që duhet t’i bindim për të ndaluar një agresion të pakuptimtë. E gjithë kjo po na bën më pak të besueshëm”, thuhet në letër.

Meloni është nën presion në vend, ku opozita akuzon qeverinë e saj se është e parëndësishme në arenën ndërkombëtare dhe disa forca politike, përfshirë disa në shumicën e saj, po kërkojnë ndërprerjen e ndihmës ushtarake për Ukrainën.

Në letër, Meloni renditi shembuj të kësaj dinamike, duke përfshirë një takim informal në Miami ku morën pjesë këshilltarë të sigurisë kombëtare nga disa shtete evropiane, Ukraina, përfaqësues të NATO-s dhe BE-së, si dhe një telefonatë midis udhëheqësve të Finlandës dhe Norvegjisë dhe Presidentit rus Vladimir Putin.

Ajo kritikoi gjithashtu përhapjen e grupeve negociuese, të tilla si E3, “Koalicioni i të Gatshmëve”, i cili bashkon 37 shtete të BE-së dhe jo-BE-së, dhe “formatin e Berlinit”, të përbërë nga Gjermania, Franca, Polonia dhe përfaqësues të NATO-s, G7 dhe BE-së.

Meloni kërkoi që çështja të diskutohet në Këshillin Evropian joformal në Dublin javën e ardhshme, me qëllim që të vendoset se si duhet të përfaqësohet BE-ja në bisedimet e paqes.

“Evropa duhet të flasë me një zë të vetëm për çështjen ukrainase. Kjo nevojë nuk mund të shtyhet më”, shkroi ajo.

Një raund i rëndësishëm bisedimesh midis negociatorëve ukrainas dhe rusë, të ndërmjetësuar nga zyrtarë amerikanë, do të zhvillohet në Abu Dhabi më 10 dhe 11 nëntor, duke mbuluar marrëveshjet e sigurisë dhe deeskalimin.