Meta mbledh tre herë më shumë të dhëna të përdoruesve sesa Microsoft ose Apple

Meta mund të jetë kompania që mbledh më shumë të dhëna nga përdoruesit në mesin e kompanive të mëdha të teknologjisë, sipas një studimi të ri nga Surfshark, i cili analizoi 171 aplikacione të zhvilluara nga Google, Microsoft, Apple, Amazon dhe Meta.

Surfshark i analizoi aplikacionet në bazë të 35 kategorive të ndryshme të të dhënave, përfshirë historikun e shfletimit në internet, vendndodhjen e saktë, të dhënat e blerjeve dhe të tjera.

Studimi tregon se Meta mblidhte mesatarisht numrin më të madh të llojeve të të dhënave, 25 nga 35 kategoritë e mundshme. Kjo ishte më shumë se tre herë e nivelit mesatar të të dhënave të mbledhura nga kompani të tjera teknologjike si Microsoft dhe Apple.

Shtatë nga aplikacionet që rezultuan më ndërhyrëse në privatësinë e përdoruesve, përfshirë Facebook, Messenger dhe Meta AI, i përkisnin të gjitha Meta-s.

Në krahasim, aplikacionet e Google mblidhnin 17 lloje të dhënash, Amazon 12, Microsoft 8, ndërsa Apple vetëm 7 lloje të dhënash.

Edhe pse, mesatarisht, aplikacionet e Google mblidhnin më pak lloje të dhënash sesa ato të Meta-s, shtrirja e mbledhjes së të dhënave nga Google dhe ekosistemi i tij i gjerë i aplikacioneve vazhdojnë të përbëjnë shqetësime të rëndësishme për sigurinë e të dhënave të përdoruesve.

Ndërkaq, Apple dhe Microsoft rezultuan vazhdimisht si kompanitë që mblidhnin më pak të dhëna në kategori të ndryshme.