Michael Jackson dominon Billboard Global 200 me “Billie Jean”

Kanë kaluar më shumë se 40 vite pas publikimit të këngës ikonike “Billie Jean” e Michael Jackson, e cila duket se po shkruan sërish histori, duke u shpallur kënga më e dëgjuar në botë.

Brenda një jave, hiti legjendar u ngjit me dy pozicione dhe zuri vendin e parë në klasifikimin global Billboard Global 200. Rruga mbresëlënëse e “Billie Jean” nisi tre javë më parë nga pozicioni nr. 65 dhe lidhet ngushtë me suksesin e filmit biografik “Michael”, i cili vazhdon të triumfojë në kinematë botërore.

Sipas të dhënave të Luminate për periudhën 8-14 maj, kënga regjistroi 51.5 milionë dëgjime në platformat streaming në mbarë botën, duke shënuar një rritje prej 7% krahasuar me javën e kaluar.

Ndërkohë, ajo realizoi edhe 3 mijë shitje digjitale, megjithëse me një rënie të lehtë prej 3%.

Michael Jackson, i cili u nda nga jeta në vitin 2009, arrin për herë të parë vendin e parë në Billboard Global 200. Në të njëjtën kohë, “Billie Jean”, e publikuar në albumin “Thriller” në nëntor të vitit 1982, theu rekordin për ngjitjen më të gjatë drejt majës, duke arritur në vendin nr. 1 në javën e 144-t të pranisë së saj në chart.

/tvklan.al